做錯事道歉，本來係做人嘅基本。 不過，有一種道歉撚，我係超憎。我稱之為「悔過書生成器」。 呢種仆街，最興開口埋口，將道歉掛喺口邊。對唔住三個字，對於佢哋黎講，一早已經毫無份量，不過係QE底下既濫發鈔票。由於早已形同家常便飯，佢地成個道歉過程都會非常流暢同專業，一如一人分飾多角嘅行騙集團所設下嘅天仙局。尤其是當犯下咗完全彌補唔到嘅過失之後，往往會出殺手鐧，搖身一變成為極度抑鬱嘅末世文青，開始洋洋灑灑血書千幾字，呼天搶地，四處陳情。 悔過書內容，大多數離唔開以下幾個結構： (1) 先自屌 將自己縮到好似粒豆咁細，幾乎想入返老母子宮重生咁滯。話自己幾無用同垃圾，辜負咗幾多人嘅厚愛。但又要暗地裡提示返，其實千錯萬錯，都有得解，或因自細心靈受創，或因自己受人所騙，所以開始日日帶面具做人，為咗保護自己，先搞到自己傷害咗其他人而不自知等等。 (2) 再反省 費盡唇舌，花盡心機，重覆表示，「知道自己今次真係好錯」，「如果可以的話，我願意長跪不起，講一百萬次對唔住」，雖然「知道自己依家講咩都無用」， 但仍然希望自己可以道歎，對方可以感受到字裡行間所帶出嚟嘅果種「真誠悔改」。

依家年紀可能真係有返咁上下，所以就算有咩事發生咗，都唔係好識得（想）安慰人。因為有心無力，真係會感到吃力不討好。 如果對方已經係傷心欲絕，咁講咩其實都無用。因為對方短期內唔會走出世界末日。做咩都係bad end 嚟。至於講果啲「喂呀唔好咁唔開心啦」、「其實我真係明㗎，換轉我係你我都會乜乜」，講完仲衰多幾錢重，噉又何必呢？ 唔開心，一係自己用自己辦法抒解咗佢；一係就用時間慢慢都沖淡咗佢；都唔得，就直接去搵醫生睇睇。唔係，都真係無辦法㗎啦。人好多嘢生來都本身唔多過癮，呢個世界邊有寫包單一定開心㗎。當然大家有時都可以有番少少空間，抗拒下接受現實嘅。 寫到呢度不其然又令我再次諗返起金句，真係金石良言。明知會仆街，都要踩埋去，呢種燈蛾撲火嘅選擇，如果唔係愛，仲可以係咩呢？好多人又誤會開解人既同時，必定要附上大量嘅數據甚至係技術分析，希望幫到手，但其實當成件事一開始已經無理智可言，咁分析係咪又真係仲重要呢？其實如果你真係咁鍾意分析，你大可以去考返個 19 分析師牌，對於疏導朋友情緒，隨時真係一啲用都無。

最近有朋友對於金融市場既二次文革既新聞似乎好感興趣，本來以為佢會寫文，但原來未寫。我對箇中緣起唔係知得太清楚，不過對於近日都有新聞話唔少學生甚至咩都唔識都拎成副身家黎炒，結果輸到一窮二白，都真係有啲感慨。 我地成日都話科技比好多年前先進，資訊依家非常流通，除左要睇甜片依家可能都係within fingertips 唔駛逐格逐格 load 之外，大家都覺得學野易左好多，因為網上面又有影片教學又有討論區，認真去研究總有人會分享到一大堆心得。例如話學瑜伽，或者係砌下模型同教人修理屋企既紕漏等等，好多野都可以Step by step DIY。既然係咁，我以為就算係理財，或者投資，理應都係同一個道理，因為其實套野發展左咁多年，都無咩變過。 之但係到有啲股票炒到天價然後開回塘甚至打回原形既時候，一大班本身贏唔少既突然輸突（當然有一堆係山頂先入，從來無贏過依家就輸身家依家唔知可以點算好），先如夢初醒，發表番一大類「唉其實大戶玩晒」、「應該真係理性啲要放番止賺止蝕」、「唔識玩 Option 真係唔應該學人亂玩」既言論，唔係話佢地既遭遇唔可憐，無啦啦辛苦賺返黎既錢一下子輸左，當然肉痛，但係食得鹹魚抵得渴，受到呢個教訓，我真係唔覺得應該比太多既同情佢地。

無論你鍾意唔鍾意、甚至好似有啲人咁超憎都好，鬼滅票房係經濟冰封期入面，仍然大收係事實，甚至可以話係創造左奇跡。 於是，又有唔少事後分析開始去講到似層層講套作品究竟點解咁紅。本來，我都以為呢啲文都應該會有一定既參考價值，而值得開黎望左一望；但估唔到佢地既論點居然係話： 因為角色夠忠奸分明，因為啲絕招有晒好記既招式名，甚至話因為角色有實力排名，打鬥節奏夠晒明快同熱血等等。真係俾佢吹脹。 咁你不如直接話因為套作品夠晒『王道』——好聽啲講的話—— 唔好聽既話，就係夠晒公式化同老土。呢度咁講，絕對無咩貶低既意思，因為有時受歡迎既野千篇一律起上黎，真係要幾例牌可以去到幾例牌。公式化亦都套左廣東話裡面一句俗語：橋唔怕舊，最緊要受。公式化起上黎但包裝得好，有時都真係可以吸引到好多人落坑同正評。 之但係，歸類左呢種所謂既成功因素之後，後人係咪又可以照抄然後爆紅坐低等收錢呢？我就覺得應該唔係，甚至可以話可能性非常低。尤其係我非常懷疑，寫出以上觀點既作者，可能未必對於日本動漫有好深入既研究。

自命小人物一個，何必費盡心力大事回顧。更何況，我覺得其他人根本未必想知。LOL 不如求其搵幾句水吹下，就結束呢一年啦。話說年底令世界最覺得驚奇既新聞，除左某大國（連同佢南方既一個以垃圾管治聞名於世一早已經響晒朵既城市）防疫政策竟然可以突然之間黎過 180 度大逆轉之外，相信就係 ChatGPT 既問世。 最簡單又最業餘地講（So77y 其實你搵我講我亦講唔到乜野 Technical 野俾大家知，或者詳情要問返 I.T. 9 遊戲日誌 ），呢個採用左最新人工智能技術既聊天機械人，除左因為訓練數據未包括到最新既新聞之外，佢可謂上至天文，下至地理，無所不能。而更加恐怖既係，佢真係可以同你做到好似人類一樣既自然傾偈對答，異常流暢，毫無文法問題，甚至你用咩語言，佢用返同一個語言回應你。呢個 AI 經已將之前研發既所謂 Chatbot 可以全部送晒去堆填區。 有人話，呢個將會成為 AI 界既 IPhone 現象級別既技術。你唔單止可以叫佢畫圖、作文、寫詩，綜合各方各樣資訊，甚至連寫 Code 都無問題，佢更加有自我修正功能。咁下一句我想講既係，唔單止係 Chatbot 可以送晒去堆填區，其實連我地都好快被送去堆填區。究竟人類仲有咩剩餘價值貢獻呢個社會，相信會係之後幾十年所有人都要共同面對同思考既問題。譬如大家都已經寫野咁耐，點知原來一個機械人十秒已經可以寫到十幾篇，小說散文任君選擇全無問題，能夠做到真正文章自動生成，而且寫得更快更好，乜野風格都可以照樣模仿到，咁大家仲覺得自己仲有咩存在價值？

我終於意識到，自己真係好耐無寫過文。（…）

呢樣野其實已經係我個心入面鬱左好耐… — 今日機緣巧合底下，終於寫左佢出黎。 點解日本依家輕小說 / ACG 系仲係咁興「穿越風」？ 其實用「依家」呢個詞黎形容實在係有啲唔恰當。因為所謂「穿越風」、「穿越系」既創作，我相信已經係日本次文化度流行左相當耐既時間，保守估計隨時有三五七年以上。我並唔係研究呢方面既專家，不過所謂既「穿越系」既故事展開，大多數都離不開主角由現實世界，因為意外（可能係被一個術式召喚、可能係因事故死亡）穿越到另一個平行世界，可能係魔幻既國度，甚至係好似 RPG 一樣既中古世紀，主角可能要從新投入一個職業（例如劍士、魔法師之類）去識新既朋友，用番現代既頭腦同智慧去解決另一個世界既問題之類。 老實講，作為一個曾經都幾業餘既文字創作者黎講，對於呢種穿越題材一開始並唔反感。甚至可以話都覺得幾有諗頭同新鮮。其實穿越本來就唔係咩新酒，你隨便講一啲所有牽涉到回到未來（例如殘酷過一夜情既尋泰記）又或者因為係一個月台上面誤打誤撞而進入既魔法世界（例如曾經世界為一紙而曾經瘋狂既Harry Potter），都可以叫做穿越既戲碼。穿越之所以好睇，係因為大家係唔同世界既價值觀激撞之下，多數都會產生非常有趣既化學作用，令人想睇下作者究竟想玩邊個。當然一講到呢度，其中一樣決定成功既因素就係設定，設定同設定：

又黎一句好耐無見，不如傾下閒偈啦。 — 睇番今年。 係 Medium 只係寫左三篇文，應該係有紀錄以黎既新低。 曾幾何時，試過係討論區連載超過十萬字既小說，亦都有係Social Media 日日寫好多長長短短既散文（最高記錄好似試過一日寫左十幾篇 Sosad），突然之間唔寫，之前都有解釋過，其實主要都係無咩心機。同埋亦都無咩動力。感覺到創作空間受限，感覺非常之唔良好。於是決定減產（當然 Medium 亦都俾唔到足夠既 Incentive 我 LOL）。有時啲野，諗左當寫左。都唔一定會有咩損失既。 得到新既時間，就盡情放空自己。 唔知大家呢一年又點呢。原來不經不覺 2021 年已經得番四個月左近。殘年急景啊。依家呢個時勢，唔係話要咒大家，但應該都未必會過得太開心啦（我估）。 除左個樓市都仲係唔知點解好好之外，其他都好似無咩特別好事發生。無力感繼續緊緊咁籠罩住每一吋空間，去到一個點開始連報紙都唔想睇，電視新聞都感到厭倦。空氣瀰漫住一種精神既真空，所以有得追星既追星，有得扮文青既繼續扮文青，因為至少呢啲活動，暫時仍然未至於犯法。好多身邊既朋友俾到我既感覺，都係努力死頂緊。如果頂唔順，就一係已經舉家離開左。大家都努力地討生活，扮若無其事咁過每一日。依家唯一可以做既野就係，努力地令到自己健康啲，長命一啲，做好自己，然後就係，漫長既等待。無人知道要等到幾時。但總之要等。

好多年前。我仲讀緊小學五六年班。 屋企仲有慣常買報紙既習慣。而果陣仲係打機搵攻略（當然仲未有網上），要自己去買攻略書，或者睇副刊專講打機欄目既年代。有日得閒無野做，扮大人攤開報紙揭黎揭去既果陣，發現果日報紙岩岩推介緊一隻 Game 既密技，果隻 Game 我有打開，就係暴風雪既魔獸爭霸。而果啲所謂既密技，依家 Google 一下幾秒已經俾到你，果陣時可以放係報紙度，你可想而知我地細個果陣其實資訊都唔係仲係好流通 — — 然後我一睇之下，仲要發覺，堆密技有啲地方係錯左既。 舉個例，例如某個 Code 輸入左會全身無敵，篇文就話會無限資源，咁樣真係唔通喎。果陣愈諗愈覺得唔妥：如果個個試完啲 Cheat code 之後發覺唔 Work ，咪會好唔開心囉。於是思前想後，膽粗粗之下，我決定寫封短信（果陣當然無電腦，要用紙筆手寫，非常 Old school），將正確既密技重新講一次，然後知道屋企果陣仲有個傳真機，就係取得家人既同意之後，我就好 Q 多事咁樣，將呢封信傳真左出去。