（Sorry，最近真係比較忙，所以少寫左好多文。）
就係我係 Medium 到寫要開拓粵文寫作空間之後無耐，香港教育局既官員就祭出左『廣東話係香港唔係母語』呢一個論點。
呢一個講法就普羅市民黎講，簡直就係荒天下之大謬，而且不值一駁。
講究學問既人，大概會努力地嘗試從母語既嚴謹去定義，但我只係一個普通既香港人，我就算唔識咁樣做，我都可以斬釘截鐵咁話俾大家知，廣東話一定就係我既母語，自細聽阿爸阿媽一路講自己都跟住講然後識用，平時絕大部份時間都係用佢黎同其他香港人溝通──
不論從返學返工，到出外面識其他土生土長既朋友，甚至講生平講既第一句粗口，第一次問候人地高堂，又或者關心人地係條街度係咪行得安好，都係用緊廣東話。母語就係最拿手最自然最可以表達到自己既溝通方法。我要從其他人口中再去教訓我究竟廣東話會唔會有機會唔係我既母語咩？我相信無咁既必要。
唔熟悉香港既人或者都未必知道。香港既教育局局長係之前上任，就已經有人問點解佢既仔女，唔係跟番香港既教育制度讀番一般人讀既中小學，反而係會讀左國際學校既呢？結果教育局局長就支吾以對，話因為當初幫小朋友諗前途果陣，覺得香港既教育制度複雜。係，無錯，香港既高官子女，個個面向住紅旗都可以面不紅氣不喘咁口中念念有詞，高唱國歌，口口聲聲愛國，但係只要一翻查紀錄，『身體好誠實』，個個仔女都就讀牛津劍橋，部份仲要渣住英國加拿大護照。呢個就係香港既現實。
講番正題。教育局果班人講得出呢一點，就係想試水溫，別有用心。就算舊時有所謂母語教育既政策，係當時亦都好明顯都已經表明左其實廣東話就係母語（亦都甚至係官話，有行政立法上既認受性），但係只要佢地收到新一輪既政治任務，要佢地改弦易轍，我相信真係話都無咁易。只要有人鍾意，佢大可以隨時拋出埋『其實都唔係個個都一定鍾意講廣東話』／『其實可能用晒普通話大眾市民一樣會受落』呢種怪論，就只係想睇下香港人條底線仲可以退讓到去邊一邊。
係早幾年前，普教中（即係以普通話教授中國語文既縮寫，呢個講法亦都深得強國中文既精粹）係香港大行其道，不少人都走出黎吹嗟用普通話教中文，會令到學生既語文學習能力更強，我就知道呢啲作戰計劃，往往都係一步一步咁樣壓過黎。今日偷襲得手，聽日又暗渡陳倉，真係今日割五城，明日割十城，好快廣東話就會從人多勢眾，變成一種勢孤力弱隨時可以取而代之既語言。而教育一定係首當其衝既，最重要係：
要建立語言既品位，甚至以語言去判定果個人既階級。當慢慢係意識形態到潛移默化，令到你既下一代覺得講廣東話係無前途既，係低一級既，甚至到最後係無社會地位，係卑賤既，廣東話就唔會再有人講。然後當人人都開始唾棄，溝通都行不通，佢就會一步一步咁樣步向死亡。雖然依家仲遠遠未行到呢一個地步，但係呢啲發展通通都係不利，同埋一次又一次咁樣敲響左警鐘。
我地要真係好警戒，努力悍衛我地既粵語文化同埋精神。